ვეძებთ სახსრებს, გვჭირდება ფინანსური დახმარება

ხუთი წლის წინ საქართველოში საოჯახო მშრომელების მცირე ჯგუფმა მნიშვნელოვანი გადაწყვეტილება მიიღო - აღარ დავრჩენილიყავით მარტო უსამართლობისა და ექსპლუატაციის წინაშე და ერთად დაგვეწყო ბრძოლა ჩვენი უფლებებისთვის.

საოჯახო მშრომელები საქართველოში და ემიგრაციაში დასაქმებულ ქალებს შორის ერთ-ერთი ყველაზე უხილავი და დაუცველი ჯგუფია. ჩვენ ვმუშაობთ კერძო სახლებში, ხშირად შრომითი ხელშეკრულების, სოციალური დაცვის, ანაზღაურებადი შვებულებისა და სახელმწიფოს მიერ აღიარებული შრომითი უფლებების გარეშე. ჩვენი სამუშაო დახურულ კარს მიღმა სრულდება, ამიტომ ჩვენი პრობლემებიც ხშირად უხილავი რჩება.

მიუხედავად ამისა, ჩვენ შევძელით მოძრაობის შექმნა.

ყველაფერი COVID-19-ის პანდემიის დროს დაიწყო. მაშინ ათასობით ძიძამ, მომვლელმა და დამლაგებელმა ერთ დღეში დაკარგა სამსახური და შემოსავალი, თუმცა სახელმწიფოსგან არანაირი დახმარება არ მიუღიათ. სწორედ მაშინ დავიწყეთ ერთმანეთის მხარდაჭერა - ვაგროვებდით და ვანაწილებდით საკვებსა და პირველადი საჭიროების დახმარებას, ვხვდებოდით ქალებს პარკებში, საჯარო სივრცეებში, ონლაინ ჯგუფებში და ყველგან, სადაც მათთან დაკავშირებას ვახერხებდით.

დღეს უკვე შევქმენით საქართველოს პირველი დამოუკიდებელი საოჯახო და ზრუნვის მშრომელთა პროფკავშირი და ასოციაცია, რომელიც ქვეყნის მასშტაბით 700-ზე მეტ საოჯახო მშრომელს აერთიანებს.

ამ წლების განმავლობაში:

• გავაერთიანეთ ასობით საოჯახო მშრომელი, რომელიც მანამდე არასოდეს ყოფილა პროფკავშირის და ასოციაციის წევრი;

• დავეხმარეთ ქალებს, გაეცნოთ და დაეცვათ საკუთარი შრომითი უფლებები;

• შევიმუშავეთ საქართველოს პირველი შრომითი ხელშეკრულების მოდელი საოჯახო მშრომელებისთვის;

• ჩავატარეთ კვლევები, რომლებიც უკვე გავლენას ახდენს საოჯახო შრომასთან დაკავშირებული სახელმწიფო პოლიტიკის ფორმირებაზე;

• წარმატებით ვიბრძოლეთ უკეთესი ანაზღაურებისა და ღირსეული სამუშაო პირობებისთვის;

• შევქმენით საქართველოში პირველი მშრომელზე ორიენტირებული დასაქმების სერვისი, რომელიც პროფკავშირის წევრებს უფასო, გამჭვირვალე და სამართლიან დასაქმებას სთავაზობს და ექსპლუატაციური კერძო სააგენტოების ალტერნატივას წარმოადგენს;

• შევქმენით ერთ-ერთი იშვიათი სივრცე, სადაც საოჯახო მშრომელებს შეუძლიათ შეხვდნენ ერთმანეთს, გაერთიანდნენ და საკუთარი ხმა გააძლიერონ;

• ხელოვნება ვაქციეთ ორგანიზების საშუალებად - შევქმენით კულტურული გაცვლისა და თვითგამოხატვის სივრცე, მოვამზადეთ გამოფენა „უხილავი შრომა - უხილავი ხელოვნება“ და საქართველოსა და იტალიაში გამოვფინეთ საოჯახო მშრომელი ქალების ნამუშევრები, რათა საზოგადოებისთვის ხილული გაგვეხადა ზრუნვის შრომა და თავად მშრომელთა გამოცდილება;

• დავიწყეთ მუშაობა შრომითი მიგრაციის მიმართულებით - ვიკვლევთ ქართველი მიგრანტი საოჯახო მშრომელების სოციალურ დაცულობას და ვეხმარებით საზღვარგარეთ დასაქმებულ ქალებს ორგანიზებასა და საკუთარი ინტერესების კოლექტიურად დაცვაში.

დღეს ჩვენი პროფკავშირი გამოწვევის წინაშე დგას.

საქართველოში ბოლო დროს მიღებულმა კანონებმა დამოუკიდებელი სამოქალაქო ორგანიზაციებისა და პროფკავშირებისთვის საერთაშორისო დაფინანსების მიღება მნიშვნელოვნად გაართულა.

ამის გამო ჩვენი პროფკავშირი სერიოზულ ფინანსურ კრიზისში აღმოჩნდა.

ეს კამპანია არ ემსახურება ჩვენი საქმიანობის გაფართოებას. მისი ერთადერთი მიზანია, შევძლოთ იმ მოძრაობის შენარჩუნება, რომელიც წლების განმავლობაში ათასობით მშრომელის ძალისხმევით შევქმენით.

თუ დროულად ვერ მოვიპოვებთ აუცილებელ მხარდაჭერას, საფრთხის ქვეშ დადგება ყველაფერი, რაც ერთად ავაშენეთ.

თქვენი მხარდაჭერა დაგვეხმარება:

შევინარჩუნოთ პროფკავშირის ოფისი

თბილისში, თაბუკაშვილის ქუჩაზე მდებარე ჩვენი ოფისი მხოლოდ სამუშაო სივრცე არ არის. ეს არის ადგილი, სადაც საოჯახო მშრომელები დახმარებისთვის მოდიან, იღებენ იურიდიულ კონსულტაციას, გეგმავენ კამპანიებს, ატარებენ შეხვედრებს და პოულობენ სოლიდარობას. თქვენი მხარდაჭერა დაგვეხმარება ოფისის ქირისა და მიმდინარე ხარჯების დაფარვაში.

შევინარჩუნოთ ჩვენი გუნდი

ჩვენი ექვსი თანამშრომელი ყოველდღიურად პასუხობს დახმარების თხოვნებს, უწევს კონსულტაციას მშრომელებს, კოორდინაციას უწევს ორგანიზებას, ატარებს კვლევებს, მუშაობს ადვოკატირების კამპანიებზე და აძლიერებს პროფკავშირს. სწორედ მათი შრომით არსებობს ეს მოძრაობა ყოველდღიურად.

გავაგრძელოთ შრომითი უფლებების ყოველთვიური შეხვედრები

ყოველთვე ვმართავთ უფასო შეხვედრებს, სადაც საოჯახო მშრომელები სწავლობენ საკუთარ უფლებებს, შრომითი ხელშეკრულებების მნიშვნელობას, სამუშაო ადგილზე დისკრიმინაციის ამოცნობასა და კოლექტიური ორგანიზების გზებს. ბევრი ქალისთვის ეს შეხვედრები პროფკავშირთან პირველი შეხების და საკუთარი უფლებების დაცვის დასაწყისია.

გავაგრძელოთ ბრძოლა სისტემური ცვლილებებისთვის

ჩვენ ვიწყებთ ეროვნულ კამპანიას, რომელიც გამოავლენს კერძო დასაქმების სააგენტოების უკანონო და ექსპლუატაციურ პრაქტიკას. ისინი საოჯახო მშრომელებს ხშირად ხელშეკრულების, სოციალური დაცვისა და შრომითი გარანტიების გარეშე ასაქმებენ, რითაც არღვევენ როგორც საქართველოს შრომის კანონმდებლობას, ისე საერთაშორისო შრომით სტანდარტებს.

რატომ არის პროფკავშირული მუშაობა მნიშვნელოვანი?

საოჯახო შრომა ისტორიულად ქალების შრომად მიიჩნეოდა და ამ დრომდე უხილავი, არაფორმალური და დაუცველი რჩება. პროფკავშირის გარეშე ეს უხილავობა კიდევ უფრო გაღრმავდება.

ჩვენი წევრების უმრავლესობისთვის ჩვენ ერთადერთი ორგანიზაცია ვართ, რომელსაც შეუძლიათ ენდონ - ვაწვდით სამართლებრივ ინფორმაციას, ვეხმარებით უფლებების დაცვაში, ვატარებთ კვლევებს, ვმუშაობთ კანონების შეცვლაზე და ვზრუნავთ, რომ საოჯახო მშრომელების ხმა ისმოდეს იქ, სადაც შრომისა და ზრუნვის პოლიტიკა წყდება.

თუ დაფინანსების შეზღუდვების გამო იძულებული გავხდებით საქმიანობა შევამციროთ, შესაძლოა შეფერხდეს წლების განმავლობაში შექმნილი მოძრაობა და ასობით მშრომელისთვის გართულდეს საკუთარი კოლექტიური წარმომადგენლობა.

თქვენი მხარდაჭერა მხოლოდ ფინანსური დახმარება არ არის. ეს არის მხარდაჭერა ადამიანებისთვის, რომლებიც საკუთარი ძალებით იბრძვიან ღირსეული შრომისთვის. ეს არის მხარდაჭერა კოლექტიური მოლაპარაკების უფლებისა და საქართველოში ზრუნვის შრომის აღიარებისთვის.

ნებისმიერი შემოწირულობა, დიდი თუ მცირე, დაგვეხმარება, რომ არ შევფერხდეთ.

საოჯახო და ზრუნვის მშრომელთა ასოციაცია და პროფკავშირის გადაუდებელი 4-თვიანი ბიუჯეტი:

• ოფისის ქირა და კომუნალური ხარჯები - 900 აშშ დოლარი თვეში (სულ 3,600 აშშ დოლარი)

• 6 თანამშრომლის ხელფასები - 4,572 აშშ დოლარი თვეში (სულ 18,288 აშშ დოლარი)

სულ 4 თვის გადაუდებელი ბიუჯეტი: 21,888 აშშ დოლარი

გააკეთე დონაცია

გმადლობთ, რომ სოლიდარობას უცხადებთ საქართველოს საოჯახო და ზრუნვის მშრომელებს.

საოჯახო მშრომელების მსვლელობა, 8 მარტი, 2026